環境局計劃今年上半年推出節約能源與綠色建築藍圖，綠色和平就率先比拼東京、紐約、新加坡同香港四大城市嘅建築物節能政策，發覺香港喺能源表現指標制訂同協助行業減排等政策都落後於人，建議政府借鏡外國，帶頭公開政府部門減排數據、要求私人單位業主向政府匯報用電情況同收緊「綠建環評」嘅評分準則等。
綠色和平項目主任楊文友話喎，紐約會強制大型建築物每年匯報用電用水量，獅城則要求大廈業主每3年交冷氣運作效率報告，效率低就要強制改善，東京更細心，主動針對唔同行業設計節能手冊，連超級市場同公眾浴場都包括，而外國政府部門嘅用電數據往往放上網畀公眾任睇，香港政府卻「門常關」，楊文友建議政府帶頭公開部門嘅用電同碳排放表現畀公眾監察。