前排清華大學法學院教授王振民話，《基本法》裏面每一個字詞、條款、裏裏外外都充滿住愛。係咁嘅話，特區區徽直頭係愛的印記，因為基本法推廣督導委員會委員戴希立噚日「爆料」話，區徽（圖）上面嘅英文用「Hong Kong」而唔用「HKSAR」，就係要照顧香港嘅利益。
戴希立噚日喺電台節目考大家，區徽上面中文寫住「中華人民共和國香港特別行政區」，下面英文又寫乜？八方同唔少人一樣，直覺就諗起香港特區英文縮寫「HKSAR」。
戴希立卻即時指正話係「Hong Kong」先至啱。佢話問過起草《基本法》嘅人，解釋回歸前已經討論過呢個問題，當年考慮到用「HKSAR」呢個新名詞嘅話，未必個個都知係乜嘢地方，而為咗保持50年不變、照顧香港利益，用番「Hong Kong」就very good。
噢，一個多麼感人的故事，區徽唔寫「SAR」三個英文字，原來係等啲外國人一睇就明白區徽代表香港，難怪有網民覺得，區徽真係由面到底都充滿住濃厚嘅愛意啊。