阿爺呢期猛話香港有港獨思潮冒起，身為建制派嘅悍將，梗係要幫手做啲嘢。有「粗口大狀」之稱嘅民建聯成員馬恩國，早前就以「依法治國訪京團團長」身份帶團訪問北京，仲向京官建議起草《反港獨法》。點知佢呢個「愛國愛港」建議、卻被部份建制派認為「古靈精怪」，潑冷水話直接為《基本法》23條立法仲實際啦。
八方記得馬恩國話過，全國人大常委會副秘書長李飛都對佢哋嘅努力高度評價，唔通對某啲建制派嚟講，吃不到的葡萄是酸的？馬恩國噚日喺DBC數碼電台節目中否認自己「枉作小人」，強調《反港獨法》就係狹窄嘅23條，認為以目前香港實況，最需要係是為反港獨嘅部份立法，仲話稍後會約見特首梁振英同律政司司長袁國強商討。
公民黨法律界代表郭榮鏗就好不滿馬恩國嘅建議，質疑發表呢啲罔顧《基本法》同法治原則建議嘅人，係為咗奉承某啲京官嘅極端想法，兼為自己謀利益囉。