一個女人有幾幸福，定義各有不同，但長跑天后姚潔貞，竟然比常人多出三倍幸福？2014年12月13日（寓意一心一意愛你一世），佢喺男友陳家豪秘密安排下，喺迪士尼閃婚；跟住今年二月，兩小口到冰島睇北極光補度蜜月；噚日仲喺尖沙嘴一酒店入面補擺喜酒，筵開39加一枱24人嘅主家席，出席嘅大部份都係田徑人。潔貞笑到見牙唔見眼，佢話細個夢想嘅婚禮都冇咁隆重喎；人哋一次過做嘅嘢，佢哋分開三次，梗係開心啦。
二人為咗潔貞爭取明年里約奧運馬拉松賽資格，暫時唔諗造人住。聽日潔貞就要隨隊到日本集訓一星期，最大心願係五月布拉格馬拉松賽，跑到兩小時四十分內，成功嘅話，就可以拎奧運入場券。