紅軍被「兩紅」連殺後，季內最重要目標剩明晚足總盃八強重賽作客布力般，就算傷停問題加劇，筆者信紅軍贏級數，成功闖關機會甚濃；亦相信就算來屆緣慳歐聯，隊內「新聞人物」史達寧會接受加薪，首肯續約。
今季，入選過英格蘭國家隊嘅翼鋒，冇乜好結果。拉爾拉拿、阿歷士張伯倫養傷中，占士米拿同達寧拼足半季後，老鬼波下半季散咗，禾確特傷後無復上季之勇；所以俾講波佬嘲笑唔夠班嘅安祖斯唐辛，都可以踢國家隊，仲入埋波剝對方棚牙。獨利記史達寧爆紅，無論踢得好壞，獲准去度假回氣定公開唔肯續約住，總會成為新聞焦點。
踢到來季歐聯，執多5,000萬鎊，係咪咁重要？負債達三億鎊、去年人工支出逾兩億鎊嘅曼聯，失落歐洲賽一季後近期如狼似虎，懶理6,000萬鎊球星迪馬利亞被長擺後備席嘅感受，誓要入番前四達標再算。傳統Big 4中，利記近年踢到歐聯次數最少，近五季只試過一次，現時負債只係紅魔嘅三分之一，以去年球會半數收入計，已可抵債。踢唔到歐聯，猛將唔肯加盟？名氣一般嘅蘇亞雷斯喺四年多前加盟利記時，紅軍「一無所有」，之後一季亦只係得第七；入貨眼光，不一定要短視對準熟透嘅大牌球星，入咗迪馬利亞、法卡奧，才令你欲哭無淚。
利記衝線乏勁，爭第五踢歐霸，唔應該係紅軍餘下個多月嘅重要目標，反而務必盡快解決史達寧續約問題。呢位20歲嘅快馬，值唔值15萬鎊以上周薪係一回事，但勞資問題浮面，列強近期伺機抽水，已動搖隊內軍心。羅渣士今季大手掃貨眼光，差到連佢自己都服晒，一眾轉會費2,000萬鎊以上嘅新人，或未適應球隊踢法，起不到重要作用；其中中堅洛夫雲，出場排序已在老將高路托尼之後，剛戰由後者去抵擋勇到爆嘅阿仙奴中鋒基奧特，實佩服羅渣士點兵勇氣。紅軍失落歐聯，來季又會大執，隊內勢人心惶惶；既然形勢有變，盡快同非清洗名單中嘅史達寧傾妥續約，用多兩季才賣，除笨有精。
大敗畀全英國近況最勇嘅阿仙奴，不足為辱；利記今季多次作客低下級別球隊未曾失手，包括史達寧入兩球、喺去年尾英聯盃3:1贏過級數比布力般更高嘅般尼茅夫。羅渣士今季想做靚啲盤數，史達寧想叫價高啲，正停賽嘅謝四想再入溫布萊，呢場盃仔賽，紅軍不勝無歸。
文：波神