郭富城、譚耀文、金燕玲同蔡潔等，噚日喺尖沙嘴文化中心出席電影《踏血尋梅》首映，該片係第三十九屆香港國際電影節閉幕電影。現年26歲嘅蔡潔以中門大開露半球嘅打扮，火併同場已年屆60歲，着住黑色Deep V晚裝嘅金燕玲。活動剛開始，李逸朗同蝦頭楊思敏姍姍來遲。
城城落老妝唔慣
49歲嘅城城型佬打扮撐場，戲中佢扮一個50多歲老差骨，同金馬影帝艾迪有唔少對手戲，城城話角色造型要染白頭髮同留鬚，帶濃烈滄桑味道，每次上妝起碼要花半個鐘以上，佢話：「每日都唔想洗頭，但唔洗又唔得，怕有頭瘡，我落咗老妝反而唔慣。」城城大讚對手艾迪演技好，寶刀未老，《踏》片改編自真人真事碎屍案，城城指導演翁子光好有爆炸力，將部戲融合動作、激情、懸疑同喜感等多個元素。
拋胸搶鏡嘅蔡潔戲中同對手白只上演激情戲，蔡潔話：「我哋有床戲同車震，意識上好大膽，拍時冇尷尬。」白只演出時有生理反應嗎？蔡潔話：「冇，大家好專業，做戲反應就有。」蔡潔憑電影《香港仔》喺今屆金像獎獲提名最佳新演員，佢話平常心面對。
撰文：馮仁昭