一條絲帶嘅顏色，足以影響你有冇工做。最近有巴打喺高登討論區踢爆，上周六去應徵政府宣傳短片中嘅角色，點知去到現場填表，被要求就政治立場表態，「中立、黃絲、藍絲」，任君選擇。負責試鏡嘅職員同呢位高登巴打講，擔心黃絲拍得唔開心，先至要求申報喎。
網名「諗唔到個名呀」嘅巴打喺高登討論區圖文並茂爆料，話自己平日接開廣告、拍戲，做吓啲冇樣、冇對白嘅小角色賺外快，近日收到通知話有政府廣告搵人試鏡。佢去到試鏡現場，聽到有小朋友試緊鏡，其中一句對白就係大大聲叫「請支持政府！」
填表揀是否黃絲
呢位巴打心知不妙，一睇到張表格就更加「O嘴」，因為其中一欄要申報政治立場，有中立、黃絲、藍絲「三選一」，巴打向負責人詢問點解要申報，引述對方回應：「如果黃絲會唔係幾好。咁佢哋係支持真普選，會拍得唔開心。」巴打即時申報係黃絲，轉身就走，網民大讚呢位巴打好型棍。
呢位巴打話呀，係黃絲就唔怕認，最多唔拍，點估到接拍政府宣傳片都要被政治審查？八方問過政府係咪確有其事？政府回應稱，政府宣傳短片嘅合約中，並無條款要求參與短片演出嘅人士，要申報政治立場。八方唔知係咪接咗job嘅廣告公司多此一舉，只知道篩走啲黃絲後，藍絲理應好開心，因為少咗人同佢爭食，但對黃絲而言，呢啲job，應該無福消受嘞。
李八方
mailto:[email protected]