香港嘅中距離馬一般級數較高，縮程喺短途爆冷win屢見不鮮，贏至2000米嘅「金銀城」，20年前喺二級賽1000米99倍贏馬，更係一代馬迷嘅集體回憶。
今季呢類縮程得手例子亦唔少，好似「赤龍駒」，上季喺高伯新旗下贏1800米，今季轉去告東尼後，縮到落1200米建功。又好似上季最佳一哩馬「大運財」，早前變招角逐1200米主席獎，連「友瑩格」呢啲短途一級馬亦要稱臣，就知中距離馬縮程嘅威力，真係唔講得笑。
今期（7日）沙田日賽，隨時又出現「大運財」翻版，有「馬場王苑之」之稱嘅靚女馬主陳穎怡，名下嘅「隨心隨意」忽然縮程跑1000米三級賽洋紫荊短途錦標，表面全無根據，但呢匹馬前季曾擊敗馬王「威爾頓」報捷，級數唔嘢小，今季亦攞過一冠一亞，狀態早已復勇。上場名次較後，只因為直路完全冇位上際遇太差。今次放棄同日主席錦標，無非避開黑衣巨人「步步友」。
睇番「隨心隨意」，將會加眼罩上陣，賽前更兩度戴眼罩彈草閘磨利前速，做法正係針對今仗縮程而來。冠軍騎師潘頓忽然肯騎已唔尋常，加上主要對手「神舟十號」退出，陳穎怡話唔定可以拉頭馬。