周日雷霆主場鬥火箭上演兩位MVP熱門嘅正面交鋒，一如賽前所料咁精采，客隊最終險勝115:112。「潮韋」韋斯卜克（Russell Westbrook）今場造出個人今季第11次「大三元」，齋計數當然係佢贏；但夏登（James Harden）除咗第10次得分「40+」之外，仲帶領球隊贏波，有數據又有實際。
包辦攻守嘅潮韋，今場就以40分、13助攻同11籃板又一次造出「大三元」，可惜臨完場前博唔到對手犯規，自己又射失絕殺，搞到雷霆連輸三場，個西岸第八位都危危乎。
居里俾尼納特守死
相反，「只係」交出41分、6助攻同6籃板嘅夏登，進攻方面就高效得多；佢今場投射命中率接近五成半，三分波仲九射六中㖭。火箭贏波之後，暫時仍然壓住灰熊守住西岸第二。以個人表現帶動球隊成績嚟計，夏登絕對比潮韋更值得當選MVP；不過喺得分榜就繼續未分高下，兩位場均都係攞到27.7分。
夏登同潮韋鬥得精采，但另一位MVP熱門人選史堤芬居里（Stephen Curry）就失威嘞。勇士作客對住衞冕嘅馬刺大敗92:107，居里仲俾對手嘅上季總決賽MVP尼納特（Kawhi Leonard）偷咗幾次波㖭。
