中環有兩個好耀目嘅舊樓重建項目，都係市建局前身土地發展局（LDC）與發展商合作完成嘅。一個係中環中心（長實），另一個係隔籬不遠嘅新紀元廣場及中遠大厦（新世界），現在嘅市建局總部就設於中遠大厦。LDC當年嘅行政總裁係石禮謙，做事好有魄力，相信佢每次行過中環中心與新紀元廣場，都會感到驕傲，乜唔係啫，呢三幢甲級商廈提供大量辦公地方，吸引不少外資進駐，如果當年唔興建，現時中環甲級商廈嘅租金一定更加貴，每朝亦唔會見到報販搬運好多好多「金融時報」到中環中心。
中環中心十分國際化，相反對面嘅舊中環街市就十分本土化，了無生氣，形格低落，睇見就眼冤，直情係英文所謂一個eyesore。唉，一早將中環街市地皮拍賣，建成另外一間中環中心嘅話，中環甲級寫字樓嘅供應等狀況就可以紓緩吓啦；點知一個荒廢嘅舊街市歷經董建華、曾蔭權以至梁振英「三朝」，仍然紋風不動，日日曬太陽，以港島中心區地皮之貴重，實在不可思議，怪只怪前任發展局局長林鄭月娥聽一啲壓力團體講，將中環街市列為「保育文物」（聽講曾蔭權其實老大不願），交波俾市建局去「保育、活化」，於是拖到如今。最新消息係（大公、星島報道），市建局認為翻新改造中環街市耗費太大（以前預算七億元，現在起碼十億元以上），而且改造工程完成後，呢個「保育項目」嘅營運實蝕冇黐牙，「長貧難顧」，會成為市建局一個財政大包袱，故此有意放棄。如果消息屬實，中環人實拍爛手掌，俾主席蘇慶和一隻大拇指Like，譚小瑩反對嘅話，早走早着。最好用途就係盡快拆卸重建成為一個中環中心或怡和大廈。
有人話中環街市係包豪斯建築風格，有保留價值，但左丁山幾年前向一位英國建築師（建築師事務所主席）G先生請教過，G先生話包豪斯風格作品也者，有好有劣，舊灣仔街市就係精品，值得保留，中環街市就係眼冤作品，拆走好過，無謂令後人學壞師，佢嘅形容譒譯成為廣東話就係：「包豪斯建築風格嘅劣徒交出嚟嘅肥佬習作。」可嘆者，好多人分唔出優劣、盲目要求保育，於是香港付出代價。市建局根據蘇慶和嘅講法要追求efficiency and effectiveness，循此思路，叫停中環街市兼改造，先至啱波路。