繼獅子山同多區行人天橋後，「我要真普選」條幅同圖案，再度出沒，仲破天荒殺入埋書店。
上周六晚，尖沙嘴美麗華商場嘅商務印書館，被一名年約40歲戴鴨舌帽男子，喺一個社會科學欄目書架上嘅其中15本社會時事書籍內，釘上「我要真普選」字條，部份仲蓋上印章。職員收工前點算後發現報警，警方列刑毀處理，書店損失約2,200元。
唔通食過翻尋味？噚日朝早11點幾，灣仔莊士敦道三聯書店（圖）有職員發現，3樓擺放政治書籍書架，有10本政治書嘅書面，被人印上「我要真普選」藍色印章同圖案，損失2,100元。警方到場翻看閉路電視，懷疑兩案係同一人所為，已撿走閉路電視片段調查。