北歐聯賽上星期開鑼，其中瑞典超級聯賽都有啲亮點㗎，前曼聯、巴塞隆拿前鋒軒歷拿臣今季就做咗希爾星堡教練，同17歲前鋒囝囝佐敦拿臣父子檔㖭。拿臣之前就做過曼聯救星，上周六聯賽揭幕戰，佢隊波嘅一、二號門將都受傷，拿臣就靈機一觸，搵咗42歲退休門將丹尼爾安達臣做替工，仲表現神勇幫球隊力保不失，賽和卡爾馬0:0㖭。
退役前國腳復出零犯錯
有一定資歷嘅球迷都一定識瑞典長青樹前鋒拿臣，佢踢過些路迪、巴塞隆拿等勁旅，2007年曼聯傷兵滿營，仲特登向希爾星堡外借拿臣三個月，都叫做幫紅魔鬼拎過聯賽冠軍。拿臣今季就重返母會希爾星堡做教練，點知揭幕戰賽前就有難題考吓佢，球隊一、二號門將柏漢臣同柏斯杜域斯基都因傷缺陣，上周六未能作客卡爾馬。臨急臨忙點算好，拿臣都算有膽識，搵咗已退休嘅前國腳，已轉任波衫管理同兼職門將訓練員嘅丹尼爾安達臣復出，臨危受命頂上。
波衫管理員個名係就係幾好聽，其實都係幫球員洗吓衫、燙吓衫，有時連波砵都要擦埋，安達臣假假哋都叫做前瑞典國腳，2001年代表過國家隊，呢份工對佢嚟講都有啲屈就。好彩安達臣都幫吓手做門將訓練員，身手都keep得住，上周六作客卡爾馬，主隊全場有六次中目標射門，全部都俾安達臣化解，據外電報道安達臣仲全場冇一次失誤，幫球隊拎到一分。拿臣賽後就大讚安達臣：「佢全場表現令我驚嘆，佢都差不多43歲，不過冇任何犯錯。」
雖然職業無分貴賤，不過波衫管理都算係粗重工作，但唔少球會對呢個崗位嘅員工都好尊重，好似曼聯嘅波衫管理員阿爾拔摩根，由1996年做到𠵱家，年資超過16年，佢仲參與過基斯坦奴朗拿度個波鞋廣告，喺費Sir鼓勵下，奧脫福全場七萬球迷都向過佢致以掌聲，做波衫管理做到咁高榮譽，真係不枉此生。
識睇，一定係睇足英台【英波Live】：
http://soccer.appledaily.com
http://bit.ly/engballlive