冇見一排嘅佔中發起人戴耀廷原來近日去咗意大利都靈市，參與當地兩年一次嘅「民主雙年會」。上月29日喺年會上以香港佔領行動為題主講嘅Benny話，估唔到有關香港發生嘅民主運動講座，容納到400人嘅劇院全院滿座，出席者仲為港人因為民主付出過嘅努力極力鼓掌。「當大家聽到過去兩年尤其是在佔領時期，港人為民主所付出的努力，他們鼓掌連續超過一分鐘，實在令人感動」。
Benny話此行印象最深刻係當地一群年輕人，自發喺市內嘅廣場舉行咗兩次舉傘行動，幾十名年輕人按節拍輪流開關雨傘，以示撐香港嘅雨傘運動，Benny當然亦有一起撐。Benny話呀，今次年會舉行嘅地點都靈市，喺意大利民主歷史中曾扮演重要角色，因為係意大利獨立後第一個首都。