唔少泛民中人趁住復活假期，諗住外遊唞唞氣，點知民主黨中委、前立法會議員黃成智，突然高調撰文叫人袋住先，甚至係發起袋住先嫌疑犯之一，搞到白鴿黨以至泛民中人，要應付傳媒之餘，又要四出打探吓，到底有邊班政界中人喺度發緊功。花生友聽聞，政府好緊張，睇吓邊個係牽頭搞手，估緊唔通政改方案出爐前，仲可以嚟個急轉彎？有人仲猜測，唔通英美政府幕後做緊最後游說？
花生友最近同建制中人吹水食飯，唔少人都問，英美政府明明都係暗撐行前一步袋住先，點解泛民仲未轉軚？據聞某國領事仲叫泛民諗諗，「通過會有乜『好處』、唔通過又有乜『後果』？」想通過嘅態度，都好明顯㗎噃。
不許英美成功爭取
嗱，花生友此時梗係代泛民說句「公道話」：泛民係代表佢哋嘅選民㗎嘛，點可以睇英美政府取態嚟做嘢呢？政府同建制派覺得佢哋會受外國勢力影響，冇計㗎噃！有建制中人聽到花生友咁講，一副「冇你咁好氣」嘅樣，繼而話喎，其實政圈除咗流傳英美政府取態係泛民轉軚關鍵，都有一個冷門說法，就係外國政府越話要，阿爺偏係唔畀讓步、唔想通過。
點解要玩到咁小學雞呀？阿爺唔係話過政改係「硬任務」咩？花生友一問，反而被建制中人「恥笑」，「阿爺咁要面，都會諗：咩世界呀，你哋叫到泛民轉軚、話過就過到，咁即係政改係英美話事、唔係阿爺話事呀？如果係咁就觸犯天條，事關阿爺要泛民自願跪低，唔係要畀英美成功爭取」。嘩，阿爺若然真係喺政改上玩到咁出神入化，難怪泛民畀唔少人認定，呢鋪難以招架。
花生友