餐館裏情場失敗的港女趾高氣揚向閨密傾訴心事，一腳踏兩船的律師男友拖拖拉拉數載，終於決定帶狐狸精「見家長」，那三個字當然是大勢已去的代名詞，晴天霹靂一錘定音，等於銀幕雞乸咁大隻字打出工作人員名單，再不起身離場便要遭掃地阿嬸辱罵。她不停以「甩咗仲好」表示自己瀟灑，看樣子也完全沒有感情創傷跡象，就像某牌子的限量版手袋被人捷足先登，吃閉門羹的豪客揚言「無情情慳番十幾萬，一天都光晒」。最令人震驚的是勝利的情敵一而再被批「好醜樣」，簡直邀請周圍無辜聽眾將眼光聚集在她五官，結論除了「唔係啩，點會仲肉酸過你」沒有第二款。幸災樂禍的旁觀者，大概會提出「或者人哋晌床上好勁呢」火上加油，菩薩心腸的開解，則肯定是「咁醜樣個衰佬都中意，睇怕真係愛情啩」，我還想起早前有部荷里活喜劇《He's Just Not That Into You》，口痕友戲譯《佢其實唔係咁想入你》，百辭莫辯喊都無謂。
成瀨巳喜男《飯》的女主角嫌婚姻生活枯燥，養隻小貓解決不了問題，思前想後毅然離家出走，長輩語重心長忠告：家陣社會陰盛陽衰，我勸你都係乖乖哋返去吧啦。那是一九五一的日本，二戰出征男丁為國捐軀一去不回，難免出現供不應求局面，逼於環境有粥食粥。奇怪的是時至今日，前殖民地的男女人口應該非常平衡，怎麼還屢屢目擊僧多粥少現象，稍具條件的男士都被奉為筍盤，引起方圓百里的雌性靈長類動物明爭暗鬥？呃，千錯萬錯莫非是基佬錯，以打孖上的節奏削減了貨物流通量？