吳國敬一連兩場的「敬．愛音樂30載作品展」前晚於紅館完滿結束，鄭秀文親證婚訊後首度跟老公許志安合體，聯同Big 4、陳慧琳與盧巧音等擔任表演嘉賓。
新歌送女友
Sammi與丈夫安仔分別於演唱會上落力表演，Sammi笑指吳國敬口直心快，她說：「其實我好驚你㗎吳國敬，平時同你合作好開心，但係一同你講嘢就腳震，有乜理由你朋友唔舒服，你就話人骨折又骨枯，佢係咁多個朋友入面最心直口快，好易得罪人。喺台下見到吳國敬有咁多朋友，加埋都220歲，要珍惜呢份友誼。」
而Big 4繼續在台上爆料，張衞健說：「佢係一個唔似歌手嘅歌手，唔似音樂人嘅音樂人，因為佢好鍾意賭馬，有一次影專訪相，佢坐喺欄杆，點知跌咗本馬經出嚟。」梁漢文說：「上一次阿敬個騷，好多朋友就喺後台準備，等佢一唱完歌就恭喜佢，點知佢一落台就離開，原來佢即刻去咗睇賽馬結果。」而蘇永康則爆大前晚跟阿敬吃辣，害他要打類固醇開聲，阿敬則還擊指曾經到蘇永康家作客時，用錯用來刷底褲的牙刷。
阿敬在完場前唱出新歌《你卻叫我更快樂》送女友，他和女友都感動到喊，他在後台接受訪問時說：「求婚諗咗三部曲，第一步係紅館萬二人唱自己作嘅新歌，第二步喺facebook 5月就會知道，第三步大家成件事會知。」
採訪：王連連
攝影：陳俊強