唔少花生友都對熱血公民黃洋達VS忠義民團阿Man嘅MMA擂台賽，引頸以待。噚日熱血公民喺facebook公佈賽事最新進展，包括搵到可以喺本年6月、足以容納2,000觀眾嘅賽事場地，但賣關子未有公佈實際地點。
而邊個主辦賽事先最公平？熱血透露曾經搞過多次「力保健搏擊之夜」嘅主辦單位，話對賽事有興趣，認為將賽事交畀獨立同有經驗嘅第三方主辦，最能保障雙方權益，相信賽事安排會更妥當，所以佢哋都支持「力保健搏擊之夜」主辦單位承辦呢次MMA，話佢哋肯提供協助、促成賽事，實為拳迷同雙方之福，只要忠義民團接受上述安排，雙方日內可以簽約咯。