這天(5日)清明節假期，到場操馬的騎師不多，督操的練馬師亦少，但葉楚航就好勤力，一早到場睇馬，其中他對今期(7日)第四場的「保羅威威」最為緊張，該駒機坪踱步後，由助手策馬經隧道往大圈，準備跳兩段，葉楚航一直跟實牠，在馬匹身後碌大隻眼，觀察其身形、步姿，明顯高度重視，之後又喺欄邊吼實其快跳過程，盡露搏殺手影。
葉澍堃等人的團體馬「保羅威威」抵港後四戰，每一場都有進步越來越接近。前仗只輸給「萬事欣」一個馬位左右，後駒最近已在三班贏馬。而上場「保羅威威」表現更佳，力拼下同「又襟又準」影相，短頭位分勝負屈居亞軍，呢匹四歲年輕馬毫無疑問既有上佳質素，亦正在不斷進步中。今仗再配柏寶跑四班田草1200米，配搭及班次路程不變外，還加羊毛面箍上陣，隻馬今朝戴面箍操練，走勢更規矩兼集中，睇嚟「保羅威威」確大有機會打開勝門。