【撬票熱門訪問】
【本報訊】政府本月中推出政改方案，針對泛民立法會議員的「撬票」傳聞從未停止，被視為中間溫和派的資訊及科技界莫乃光是撬票熱門之一。他接受本報訪問時稱，雖然部份功能組別議員以業界民調定政改投票立場，但他無意仿效，認為政改關乎全港市民福祉，不應只看業界意見，指假普選是「冇咁毒嘅毒藥」，至今拒絕「袋住先」。
莫乃光承認作為功能組別議員，業界意見是他們投票參考指標之一，但他稱其界別難以進行民調，因為大部份選民難以聯絡、不少人也可自稱為IT界，「我個界別想做民調真係唔容易做，我哋唔係其他業界如醫生、律師有工會；即使界別有專業學會，但都係得幾千人，只係問佢哋唔公道……IT界有7萬人，我可能只係問到5,000人，結果出到嚟係唔可信」。
撇除技術問題，他更認為政改問題關乎全港市民福祉，作為立法會議員，不應只看業界意見：「巴士、港鐵應唔應該加價，冇理由淨係問IT界。」
8.31方案「有毒解藥」
部份建制派中人近日私下以政改方案若被否決，特首梁振英或能再連任為由游說泛民「袋住先」，莫乃光認為，原地踏步不代表梁一定能夠再次當選，「我哋唔可以畀人嚇咗先」。他強調普選乃重要問題，不能本末倒置，以為「袋住先」的一人一票或可踢走梁振英，便接受假普選，分析指：「有兩件毒藥，係咪揀食一件冇咁毒嘅毒藥，就可以當係解藥、當係解咗更加毒嘅問題？你以為冇咁毒嘅毒藥，其實都夠毒死我哋。如果係咁，我寧願兩樣都唔食……我唔會接受食一個有毒嘅解藥，去解決梁振英呢個最大嘅毒害」。
莫乃光今年2月接受電視台專訪時，曾指中央若承諾2020年取消立法會功能組別會考慮「袋住爛橙」，一度被質疑轉軚，他其後澄清自己「講得唔清唔楚」。
■記者姚國雄