經民聯梁美芬早前喺立法會發言話，警員陀槍喺身，如果有人隨便侮辱令佢哋失控會好危險，建議研究訂立辱警罪。曾經幫過梁美芬打工嘅正義聯盟召集人李偲嫣當然同聲同氣，佢個組織連同撐警大聯盟為撐「慈母」，連續13個周日去各區收集市民簽名支持訂立辱警罪，噚日就去到中環，嗌咪時仲準備好貓紙中英雙語廣播，話佢哋至今已收到逾9萬個簽名支持立法。
為辱警罪爭拗
點知呢排不時被偲嫣BB狙擊嘅熱血公民，亦「咁啱」喺同一地點開街站，打對台話反對訂立辱警罪喎。佢哋話𠵱家警方一句涉嫌阻差辦公，已經可以拉人啦，如果仲訂多條辱警罪，市民連批評多句都可能俾人拉。而反對立法嘅同時，佢哋仲話要「打倒人形豬」喎。
由於兩陣營對壘、加上兩個街站相距不足50米，唔少傳媒都喺現場守候，旁邊亦有好多花生友等住睇戲，但唔知係咪因為警方嚴陣以待，出動逾半百警員在場戒備，不單分隔開兩邊夾埋得嗰廿幾卅丁友仔、又喺高位拍攝熱血公民嘅街站，搞到兩邊都一反常態好斯文，未見火花。
八方現場所見，雙方支持者除咗間唔中會有口角，4個幾鐘口水戰，冇乜大規模衝突場面發生。多得警察盡忠職守，噚日嘅中環，冇乜花生食；但係蚊呢，相信就有唔少人周圍放嘞。
李八方
mailto:[email protected]