雖則係復活節假期，財爺鬍鬚曾照舊無休同大家周日一blog。佢噚日喺網誌話呀，上周出席一個座談會時，大部份與會主修商科嘅大學生，發言都並非一面倒追逐盈利，好多人相信企業賺錢以外，仲有作為企業公民的功能和責任。
鬍鬚曾覺得由此可見，年輕人普遍唔只着眼金錢利益，仲好重視工作意義，認為追求理想同發展經濟，其實係有相當大嘅兼容空間：「正如大部份重視『心中富有』的香港人，其實也明白這個道理，大家一方面全力追求更高層次的理想，另一方面重視發展經濟、創造財富，希望利用財富去解決不同的社會問題，改善大家生活。」佢話確實有少部份人唔重視、甚至反對經濟發展，但強調呢班人其實亦一直享受緊經濟發展成果。