周二(7日)沙田日馬算係大賽日，有準馬王黑衣巨人「步步友」出場，角逐二級賽主席錦標。每逢大賽日，各場上陣馬水準一般較高，但今次第四場四班1200米卻似乎例外，全組14駒居然冇一隻今季贏過。咁嘅環境下，邊隻將力足取勝？
大家不妨信信騎師榜遙遙領先嘅雷神，佢將連續第五次策騎蔡廐「花紅」，呢匹三歲馬四戰仍未上名，但雷神始終唔放手，明顯睇好隻馬嘅前景，之前贏唔到，相信只係火喉未夠，時機未到而已。
「花紅」馬主團體成員高德謙係中環心臟科名醫，亦係藝人薛家燕姐夫。除咗跑馬之外，高醫生仲熱愛跳繩，乃兩年一度，去年「世界跳繩錦標賽」嘅籌委員主席。家陣比賽已結束，高醫生當然有較多時間玩吓馬仔。
睇番「花紅」，上場跑1000米直路賽，排最劣嘅1檔，都輸唔夠兩身位，反映狀態已逐漸到位，中距離血統馬，今次增程跑1200米一定更合，如果能勝出，高醫生同一班團體成員可佔30萬獎金，睇怕呢筆花紅佢哋實食冇黐牙！