有網民喺facebook發起噚日去到亞視大埔總台「拜山」，「賀」亞視被釘牌。呢個「4·5清明齊賀亞視釘牌」嘅專頁，本身有78個網民話會到場支持，但下晝2點開始嘅活動最終到咗3點，都係得一個人撐場。
呢位咁有心嘅阿Jack姓鄭，特登由屯門搭車嚟大埔。佢話由2010年王征注資亞視起，到2011年誤報江澤民死訊、2012年喺政總跳騎呢舞，甚至喺舊年年尾起拖糧佢都有留意。問佢會唔會覺得以後得番一個大台未必係好事？佢就話：「少咗亞視可能就無綫一台獨大，所以希望港娛（香港電視娛樂）快啲有頻譜（大氣電波），香港觀眾可以真係有選擇。」
佢邊向亞視大門鞠躬，邊口噏噏話：「對亞視被釘牌表示安慰！」講到點解得佢一個人孤伶伶？佢就話：「其他人放飛機囉！」