機管局承諾喺今年底前將機場碳排放量降低四分一，機管局工程團隊從照明系統着手，過去5年耗資約1億，喺機場兩座客運大樓、地面運輸中心同北衞星廊，將10萬盞燈全面更換成LED燈，每年慳咗1,500萬度電，相等於2,800個四人家庭一年嘅用電量，仲可以減少9,500噸碳排放。機管局工程及維修部高級經理黃家和向八方透露，原本用緊嘅石英燈同金屬鹵化物射燈（Metal Halide）等燈具，壽命僅1年至1年半，LED燈壽命就長達4至6年；而兩座客運大樓裝上嘅5,900盞新研發嘅高架LED燈，光度較原本使用嘅射燈高3成，由於演色度更佳、顏色接近自然光，以後喺嗰度影相selfie都會靚好多。