昔日香港馬王「好爸爸」的同主馬，將列陣今期(7日)第十場三班田草1200米的告廐馬「精壯神駿」，前仗在同一路程擊敗「仁仁友福」和「正大光明」兩匹惡馬掄元，後兩駒再出都非勝即位，其中「正大光明」翌仗更大勝對手，已加到79分接近二班水平，可見「精壯神駿」贏馬一役水準極高。
可是「精壯神駿」上場增程跑1400米，居然三甲不入，衝落反應平平只得第五，究竟隻馬有乜問題呢？該駒騎師郭能表示，「精壯神駿」絕對不是敗於實力，而係當日走勢欠規矩，不時有內閃傾向，而且末段又曾受阻，所以今場特登加面箍以解決問題，郭能又話以「精壯神駿」目前情況來睇，可能尚需一啲時間，先至有足夠貫注力贏1400米。
今次「精壯神駿」回師贏馬路程1200米有利之外，郭能亦指出三匹主對手各有缺點：好似「鄉村輝煌」連仗連老馬「御鋒」都跑唔贏，今次初次扳上1200米外，更以三歲馬身份讓四歲的「精壯神駿」四磅不利。至於「萬事欣」，上仗只險勝半身位，今次加分加磅，檔位亦冇上次咁好。而「正大光明」更係「精壯神駿」蹄下敗將，所以郭能有信心今場可以取得勝利喎！