每逢政治敏感時刻，泛民中人例牌都會收到唔少偽冒嘅有毒電郵，一個唔為意開咗嚟睇，分分鐘中招俾人入侵埋部電腦，偷晒啲資料。花生友聽聞，政改方案出台在即之際，假電郵再度喺泛民陣營出現，今次被盜用名義發電郵嘅目標就係民陣。
話說泛民中人以至部份傳媒，近日不約而同收到一封名為「4月9日民陣大會會議議程」嘅電郵，入面有晒時間、地點，連信件格式都抄足平時泛民嘅開會通告咁，仲要加多句叫人報名參加民陣4月19日搞嘅「雨傘運動檢討與前瞻研討會」，仿真度真係好高㗎。
據知呢封電郵係以一位泛民議員助理同名嘅電郵地址發出；花生友問過呢位議助，佢都好無奈話呢個電郵地址，係有人假冒佢開㗎，而且今次已經係第二次，上一次大約兩個月前，有人冒認支聯會以佢個電郵地址發電郵，訛稱有支聯會嘅六四活動云云。
其實雨傘運動前後，偽冒電郵都滿天飛，花生友聽聞，近年泛民中人唔少都改用可以加密嘅通訊手機應用程式收發重要資料，甚至面對面講、免得大意中伏。
有泛民中人就話，據聞西、北兩邊嘅人士，近期頻頻打探政改方案出爐日，有冇抗爭行動搞、今次由邊個牽頭。佢都唔想將政改同假電郵掛鈎，但就呼籲同路人小心免中伏。
花生友