許冠傑（Sam）前晚喺澳門開騷，同以往嘅騷一樣，當然唔少得同女粉絲咀嘴啦！阿Sam唱到《最喜歡你》同《錫晒你》時落台同觀眾握手、抱抱同錫錫，有啲女fans熱情兼夾狼，衝埋去索吻，仲同阿Sam咀到啜啜聲。阿Sam介紹囝囝許懷欣出場時，就播咗懷欣細個嘅片段，懷欣仲同阿Sam嘅徒弟林宏龍（Justin）一齊合唱。
之後阿Sam就同大哥許冠文合唱《是雨？是淚？》，許冠文喺台上話：「其實阿Sam好少唱呢首歌，仲有一個細佬（指已去世的許冠英）都好鍾意呢首歌，相信佢喺另一個世界都會聽到。」跟住許冠文仲借咗細佬個舞台搞吓棟篤笑，佢話：「𠵱家啲新歌感情冇咁濃，嗰首hit歌《江南Style》，我繙譯過，歌詞係話『你阿哥我有江南風格，性感的女人』，呢啲係乜嘢情？都係阿Sam嗰啲有感情，所以大家要懷念阿Sam嘅歌。」
臨別緬懷李小龍
除咗屋企人做表演嘉賓之外，今次仲有個稀客，就係一代功夫巨星李小龍個女李香凝喇！佢哋合唱咗首《Somewhere out there》，唱到臨尾時仲一齊望住螢幕播出嘅一批李小龍舊照。
撰文：馮仁昭