呢幾日天氣唔錯，唔外遊嘅朋友，好多人都去咗郊遊。而全國政協常委唐英年呢，唔知係咪忙於籌備5月成立嘅「香港江蘇社團總會」，所以呢個復活節就留港度假，月底先至出發上郵輪。
既然天朗氣清、風和日麗，唐唐都不失時機，前日去咗探佢嘅「新歡」，佢仲大膽到將同「新歡」嘅煙韌合照放上微博（圖），甚至留言大讚佢「年青活潑、非常可愛」。嘩，咁鬼張揚，唔驚唐太呷醋咩？八方相信唐太絕對唔介意，事關咁獲唐唐寵愛嘅「新歡」，住喺沙田馬場，咪就係佢嘅新愛駒「回眸一笑」囉。如果呢位「新歡」出盡力畀唐唐拉多幾次頭馬，肯定令唐唐對佢更加寵愛有加。