謎一樣的型男古天樂，繼玩具倉大揭秘後，其私人事也大公開！本報訪問了十一位市民，每人向古仔錄影了一條問題，再由他親自解答。
想知古仔喜歡甚麼類型女仔？幾時成家立室？就要留意啦！
採訪：魏嘉琳、馮國康
Q1.朱小姐：古仔，你鍾意浸浴缸定淋花灑？
古仔：其實一個人瞓覺嘅時間都冇乜嘅時候，仲走去浸浴缸，我驚會暴斃。所以我都係淋花灑嘅。
Q2.鍾先生：你幾時開放你個玩具倉畀人參觀？
古仔：正式嚟講係唔會對外開放，之前有幾個患病嘅小朋友好想嚟，我都有招待佢哋嚟睇。我覺得可以開放吓畀佢哋睇，等佢哋開開心心，又可以同佢哋傾吓偈，咁我都好願意去開放。
Q3.黃先生：你請唔請人打理你個倉？考慮吓我吖！
古仔：通常好醒目嗰啲入到嚟呢，都會好慘咁出返去。點解呢，因為其實呢度之前真係請過人返嚟打理，但嗰個人都好似返唔夠一個月工就已經話唔做。因為其實呢度如果冇乜人嘅時候，一個人對住咁多個1：1公仔，其實都幾驚。佢話啲公仔好似會郁喎。
Q4.張先生：你平時鍾意着舊T恤瞓覺，定着成套睡衣？
古仔：我話畀大家聽，我瞓覺係着套盔甲嚟瞓，唔知大家有咩反應？咁梗係着睡衣瞓啦！（無奈）
Q5.鄧太：古仔，你幾時成家立室呀？我介紹我個女畀你識吖？
古仔：嘩，點係呀Auntie，睇吓幾時撞到，介紹吓啦！
Q6.鄧小姐：你究竟鍾意女仔化濃妝，定係素顏呢？
古仔：我絕對鍾意女仔係唔化妝嘅，我覺得最真一面至係最自然。
Q7.曾小姐：你鍾唔鍾意食煲仔飯？肉餅啱唔啱你？
古仔：其實將個仔嚟煲都幾殘忍，不過我都有食吓嘅。我自己都比較鍾意食肉餅飯多啲。
Q8.吳先生：你細個鍾意睇咩漫畫？你𠵱家有冇睇？
古仔：其實我已經冇睇漫畫好耐啦。
Q9.林先生：你細個畀阿媽打得最甘嗰次係為咗乜嘢？
古仔：通常都係話我成績考得好呀，又好聽話呀，咁又打吓我囉。
Q10.鄧小姐：你鍾唔鍾意狗？你屋企有冇養寵物？
古仔：我係比較鍾意狗多啲，但暫時都唔會再養寵物住，因為對寵物嘅感情我都投放幾深。
Q11.關小姐：中西意法日韓餐，你最鍾意邊一款？
古仔：我好鬼鍾意食，中西意法日都鍾意。不過我覺得食其實就講心情，食乜嘢冇乜所謂。
