今日大家心情應該唔錯，皆因放咗兩日紅假，計埋今日你仲有三日至返工，更好彩嘅就係去緊旅行，用wifi碌緊網上版嘅你，但無論身在何方，都應該冇錯過尋晚阿仙奴對利物浦嘅大戰，小弟寫稿時未知結果，但觀乎近來利記狀態實在麻麻，就連上仗對曼聯都「賠了夫人又折兵」，輸完波仲要K.O.謝老四，此一最後雙紅會，四哥一出一入都唔過一分鐘已告謝皮（男人大忌也），曼記粉絲當然得勢不饒人大呼「神奇隊長果真神奇」，難為一代大將黯然謝幕於世仇，世事難料也。
最近同告謝幕者，當然係城中熱話嘅老周電視台，大家呢幾個月（甚至幾年）嚟都忍受得佢耐，人皆願執之而後快，臨死幾日仲要放風有翻生機會（王生都算係另一神奇頂級超卓隊長），但最後都係敗走收場。
回帶當年，亞視都吸引過唔少球迷眼球，如80年代英國足總盃（主題曲我仲記得），我首次聽到「紅魔鬼曼聯、利物浦、愛華頓」等都在此處，90年意大利世界盃直播又玩「飛廣告」，連杜汶澤太太田蕊妮94年都唱過世界盃主題曲《熱燙的宇宙》，之後星期日早上又有《NBA地帶》，相信好多中老坑球迷都有唔少回憶。觀今亞視下馬，就如球員球隊，有高𥧌有循環，該走總要走，否則像689，上周欖球賽頒獎，成為全場唯一噓聲目標，恥也。
梁栢堅
填詞人+彩池人