中環海濱除咗有維港靚景，噚日晏晝仲有「飛」車表演。講緊嘅係「Red Bull X-Fighters Jams」花式電單車表演，除咗吸引38,000觀眾逼爆睇騷，連「體操王子」石偉雄等大班星級香港運動員都嗌破喉嚨，主項跳馬嘅「石仔」仲搞笑話自己旋轉技術未到家，要返去苦練喎！
石仔自嘲唔夠人勁
四位世界級車手噚日齊集中環海濱，首次喺香港上演花式電單車表演，雖然氣溫近攝氏30度，但大批粉絲喺烈日當空下都堅持排長龍入場，當中仲有「石仔」、靚女泳手歐鎧淳、退役車手黃蘊瑤等星級港將。首節以Nick Franklin為首嘅世界級車隊，先後騎住電單車由弧形斜台，飛越對面嘅高台同觀眾say hi，之後造出連人帶車360度轉圈、倒立、踩手把嘅高難度動作，搞到觀眾嘅歡呼聲仲勁過引擎聲。
原定三節各20分鐘嘅表演，足足玩咗個半鐘粉絲都唔夠喉，大嗌encore，車手都相當識做，換唐裝揮區旗，再上演接力賽令全場high爆。當中嘅歡呼聲，點少得佔喺最前位置嘅一班港將。「石仔」帶埋女朋友阿Lo入場，睇完仲話自己嘅跳馬動作都冇得比：「車手嘅高難度動作太勁，搞到我都心思思想考電單車牌。自己嘅跳馬動作難，成日凌空旋轉，但原來佢哋先至係高手，都要諗吓有冇得學番一招半式。」
揸咗兩年電單車嘅空手道港隊代表李嘉維，噚日亦有拉埋張均樂、張小倫等體院老友入場，佢話之前喺澳門睇過室內花式電單車表演，唔夠呢個戶外場咁刺激。「鐵血女將」黃蘊瑤見到咁好氣氛，都話好羨慕：「之前喺活動宣傳日試過踩模擬器，但始終現場睇先最震撼，亦都希望單車比賽可以咁受矚目，可以令觀眾high爆。」
