清明時節，燒祭品畀先人係理所當然，不過陽間嘅科技日新月異，陰間，都要跟貼潮流。著名網上節目《恐怖在線》主持、鬼王潘紹聰就去大家探索一下，究竟喺陰間，智能手機暢唔暢「燒」呢？
鬼王先派出兩位動記者，到荃灣專做紮作嘅曜記，問問負責人張潔蘭小姐，張小姐話：「先人當然要智能手機，喺下面聯誼聯誼啦！『埃瘋』同『三叔』兩大手機都各有支持者，冇話邊個特別多擁躉。」
鬼王之後再專程走到深水埗，訪問寶華札作嘅「80後紙紮達人」歐陽秉志。歐陽先生除咗話畀大家知，陰間智能手機嘅套裝已經好齊全，連俗稱「尿袋」嘅手提叉電器都有，仲表示想要粉紅色「埃瘋」嘅話絕對冇問題，訂製就得。唔止咁，連陽間都未有行貨嘅Apple Watch，喺陰間已經好暢「燒」！