Sunday Fever:亞視原本好勵志 - 馬啟仁

Sunday Fever:亞視原本好勵志 - 馬啟仁

長長嘅復活節假期,對好多人嚟講正係好好唞唞氣嘅時機,因為令人窒息嘅事件實在太多,諗番自細睇亞視,多得家中老竇鍾意鋤強扶弱,仲話我知呢個台嘅節目有一個共通點,就係好勵志,啱晒球迷們咁話。
小朋友感情其實好易呃,尤其是你有禮物送,細細個真係收過ATV兩份大禮,第一份係佢哋趁地鐵啱啱通車嘅時候,喺彩虹站派銅錢宣傳《天蠶變》,嗰時雲飛揚嘅地位勁過家陣嘅尹佩斯,所以我一放學就同隔籬屋阿朱女去排隊攞,個銅錢唔見咗好耐,但到近排同班老餅行山迷路時,都好自然會哼兩句:「獨自在山坡,高處未算高」嚟壯膽!
第二份禮就喺旺角場攞嘅,唔記得點解要去球場嘞,總之係好多小朋友排排坐攞眼鏡,係3D眼鏡,即係一邊藍一邊紅嗰種第一代立體眼鏡,用嚟做乜呢?係畀你返屋企睇立體嘅《星仔走天涯》嘅!
大專時直頭差啲愛上亞洲電視,因為佢哋竟然會直播大專運動會,比賽嗰日我專登校定錄影機,睇吓自己會唔會上鏡,可惜由於跑得太慢,淨係得起跑時出現咗十分一秒,於是下定決心練多啲跑快啲再博上鏡,下年我真係跑快咗嘞,但ATV已經冇再轉播。
當年收費電視未主宰體育節目嘅時候,星期日朝早嘅《NBA地帶》係令人會早起身嘅原因,同無記嘅《球迷世界》一樣,對推動運動以及香港人早睡早起曾經有深遠貢獻,只係時至今日,波友只會越來越夜瞓。
喺大賽直播權未發展到只有獨家玩晒嘅時候,亞視喺世界盃同奧運就擔當咗黑馬嘅角色,牌面永遠輸無記一截,但係反而激發咗佢哋靈活變通,由明星足球隊嘅嘻嘻哈哈,到霑叔嘅執波仔角色,都係好好嘅示範。
其實做體育節目有好多種方法,而我懷疑球迷之中,有好多都係鍾意剝花生嘅,最好你哋電視台就鬥得激啲,咁我哋又睇得爽啲,而亞視喺90年出咗最絕一招,就係現場直播唔播廣告,當時贏盡球迷掌聲,之後就成為咗電視直播嘅標準格式嘞,搞到講波同事想唞吓都唔得。嗰屆仲有開心主流派唱主題曲,可惜我到今日都未見過19比9同29比9嘅賽果,林敏驄你呃人。
亞視停播在即,但暫時都仲未放棄播本地波,算係幾有體育精神,大家入場睇波時,不妨同亞視員工打吓氣。

KEYMAN
節目主持