證監會副行政總裁兼產品部執行董事張灼華在二月退休，本想約佢吃飯賀佢榮休，點知佢在新年期間去吳哥窟旅遊，入洞穴時扭傷隻腳，乘興而去，敗興而返，回港休養近兩個月，已可憑枴杖行動，於是再約吃飯日期，但時間不合，而佢又要飛去美國密芝根大學中國研究中心演講，五月先至回港，餐飯唯有一等再等啦。
密芝根大學係州立大學，密芝根州有州立大學系統，類似加州大學，系統內有密芝根大學（UM），密芝根州立大學（MSU），西密芝根大學（WMU）等等，排名當然以UM最高，係美國一流名校，UM嘅中國研究中心叫做LRCCS（Kenneth G. Lieberthal and Richard H. Rogel Center for Chinese Studies），在美國赫赫有名，已有50年歷史，歷來人才輩出，係美國嘅中國研究重鎮，曾培育過不少知名中國通，對美國嘅對華政策發揮過影響力，當今權威中國專家沈大偉David Shambaugh就係UM博士。今張灼華獲邀請到該中心作傑出訪問講者，發表幾次講話，與中心研究人員交流，可見得張灼華對中國之認識，特別係人民幣產品、中國證券市場、滬港通等等，已國際知名。
接替張灼華做證監會執行董事，負責產品部及與中國對口單位聯絡嘅，係中大新亞師妹梁鳳儀（Julia），Julia之前係財經事務及庫務局副局長，再之前係金管局助理總裁，佢在新亞書院新聞系（1982）畢業之後，去哥倫比亞大學新聞學院深造得碩士學位，回港後出任亞洲華爾街日報記者，後獲金管局總裁任志剛邀請進入金管局負責對外事務。記得二十幾年前，梁師妹安排左丁山與任總在希爾頓酒店鷹巢吃午餐，情景至今仍歷歷在目。
梁師妹在新亞書院讀大一英文時，老師係一班Yale Bachelor's（耶魯學士），其中一位叫做Drake Pike，（中文名白杰克），Drake後來在香港工作，做過雷曼兄弟，後到高盛，做高盛駐北京代表，常常來港，倘若佢知道昔年一位女學生今天貴為監證會高層，香港財金界主要人物之一，會非常高興。歷來到新亞教英文嘅耶魯學士，最出名一位當然係左丁山之老師黎天睦（Timothy Light），回美後曾任西密芝根大學常務副校長，因張灼華到UM演講，上網瀏覽，無意中發覺WMU有一個Timothy Light Center for Chinese Studies，當然係黎天睦先生捐贈成立或尊敬佢而設立嘅。