資深演員搖身變成新晉導演的例子，如趙薇、張家輝及任達華等近年屢見不鮮，吳家麗是最新加入的名字。提到吳家麗，不少人會想起她的風情萬種，即使年屆五十有一依然魅力不減。但是吳家麗這回自導自演，故事卻設定成令人心寒的殺妓懸疑案，以血腥恐怖探討人性，她更邀得任監製的多年好友翁秀蘭（Shirley）齊齊下海，首執導筒為從影多年的影圈「還債」。
撰文：盧妹
吳家麗與翁秀蘭日前在九龍灣為她們首次合作導演的電影《花街柳巷》接受本報專訪，對於做導演緣起於吳家麗想在影圈「還債」，她說：「自己喺影圈咁多年，覺得要還債，想自己搞個古仔試吓，難得有人肯冒險畀我做新導演，於是我就負責諗古仔，Shirley就主要負責推廣。」
「我失控咁喊」
吳家麗借變態殺人狂探討背後的成長故事：「個題材係講一樓一、花街，因為呢樣嘢已經有幾千年歷史，做呢行嘅女仔不被尊重、冇人留意，其實好多女仔係好無助。我揀呢個題材係因為震撼性大，主要係想講人嘅心態，原本好單純嘅人因為被遺棄而返嚟討血債。人有好多黑暗嘅嘢、恐怖嘅元素，好似之前捷運嗰單斬人案、有人會拎槍入校園殺人咁，到底佢經過乜嘢背叛、傷害，我哋齣戲係講一個人嘅血淚史。」
Shirley認同很多人以為女性導演會選擇拍攝愛情故事，於是她們從女性角度分析人性：「睇法會有別於男性導演，我哋主要想細味人物變化，如果我哋可以對呢啲悲劇多啲關心，可能故事就唔會係咁。」
身兼導演及演員的吳家麗，直言沒想過會參演：「個古仔出咗，大家都覺得我就係戲中嘅麗姐。」她透露其中一場最震撼的是麗姐發現眾多「好姊妹」已死的一幕：「我失控咁喊同大叫，cut機之後都仲叫緊，睇番playback聽住自己叫覺得好心寒，冇諗過自己會投入到咁、好入局，用咗好耐時間先平復到，不過係好享受。」
問吳家麗和Shirley拍攝時可有拗撬？Shirley坦言個個劇組都會發生，但最後都會互相妥協，吳家麗則笑謂大家都只想部戲好，始終是團隊工作，故會少數服從多數。
陰陽人增悲劇感
吳家麗直言希望為角色加入悲劇感，於是設計許雅婷（Kabby）是陰陽人，她透露由Kabby做主播時已經有留意她：「陰陽人係上天同呢個角色開好大嘅玩笑，經歷由細到大嘅事令佢唔識笑，要搶人哋嘅生命嚟滿足。我搵Kabby係覺得佢外形好單純，好似要受人保護咁，個角色需要嘅反差好大，想畀多啲機會新演員，如果影圈再冇新血會斷層，揀冇可揀㗎啦。」
場地提供：E-Max
【Kabby血漿密室拍到嘔】
許雅婷（Kabby）在電影中飾演復仇者晴晴，因為三番四次被遺棄在孤兒院，令她跌入人生低谷，只為復仇而生存。戲中不乏殺人的血腥畫面，令Kabby大呼過癮：「以前我以為自己係拍賀歲片嗰啲，點知我拍完呢齣戲，發覺自己鍾意咗血腥嘅感覺，其實每個人都有黑暗面但係唔發覺。」Kabby首日開工便要在滿佈血漿的密室內拍攝，她自爆去到現場即忍不住嘔。
Kabby笑謂在泰國拍攝期間似精神分裂，因為片場以外是陽光與海灘，但晚上回到酒店看劇本，讀到角色的悲慘故事，令她情緒起跌很大。
化妝：Kae Li
服裝：Amelie Street
