眾所周知，過馬路掛住玩手機做低頭族隨時會發生意外，但阿根廷U17小國腳哥歷尼（Thomas Conechny）就話畀大家知，留喺室內打電視遊戲機都危機四伏㗎。哥歷尼最近同班朋友去巴拉圭旅行，慶祝自己17歲生日，有一晚佢同老死喺酒店房打《FIFA》，點知挨住個窗打機嘅佢激動得滯，成個人突然向後跌出窗外。
不過，好彩佢間房喺一樓，由10呎高跌落去只係扭傷腳同撻到瘀晒。死過翻生嘅哥歷尼就話：「個窗無端端打開咗搞到我跌落去嗰陣，我真係嚇窒咗，好彩唔係傷得好重，我仲可以開party。」難得佢仲可以撐住拐杖，喺生日蛋糕上吹蠟燭繼續慶祝㖭（圖）。