港鐵公司宣佈地鐵加價，加幅三年來最高，達4.3%，相等於12月份CPI乘0.5加運輸業工資升幅乘0.5，再減生產力增幅0.6，就係（4.9 × 0.5）＋（4.9 × 0.5）－0.6等於4.3，呢條可加可減機制所訂下嘅公式，每五年檢討一次，下次係2017年。既然有機制公式，遵照合約辦事，無說話可講，只是一啲議員及甚麼關注組循例大罵一輪，鬧港鐵無良，實在無聊。怪只怪立法會議員當初通過可加可減機制及公式。一有咗公式之後，除非香港再有建華七年嘅通縮啫，如每年有通脹，運輸業員工有人工加嘅話，港鐵根本係年年奉旨加價。除非係咁，將條公式改為：扣減生產力增幅之後，再扣減港鐵EPS（每股盈利）之增幅，例如2014年港鐵每股基本盈利係2.69元，比2013年之2.25元增加19.5%，呢個EPS增幅可以乘0.5、0.4或者0.2，無論點扣上又扣，加入呢個元素之後，地鐵車票價大有機會減價，除非地鐵業績倒退啦！啲議員可以諗諗佢！
港鐵做事，動輒得咎，乜都可以俾傳媒及議員鬧一餐，做公關阿頭相當唔易，唔怪得又有傳聞話港鐵要增聘猛人做執行總監負責公關及企業傳訊，既然去到執行總監呢個位，人工就夠晒高，星島日報話計埋花紅認股權，可以去到五百萬港元，相信可能係一個公關界嘅紀錄，咁高薪，誰人敢孭飛呀？現工業總會行政總裁，前商務及經濟發展局副常任秘書長蘇家碧（圖）喎，做過高級AO，係零舍唔同嘅，工總係行業組織啫，邊度出得起五百萬年薪吖，出得起都會俾會員鬧。
香港素來男女同工同酬，公關界由女士主導，已成風氣，冇人話唔公道，唔似得美國咁，號稱平等，至今男女爭風不絕。矽谷素來被批評為白人男人世界，女士難以上位，不知是否因為如此，Google特登從華爾街大行摩根史丹利挖角，搶走大摩嘅CFO Ruth Porat到西岸，年薪及花紅認股權每年高達7000萬美元，令美國東西兩岸為之譁然，做CFO值唔值咁多人工呀，Google大把錢，現金流強勁，向大摩搶人做乜？
有網民指Porat人工過高，即刻俾另外一啲網民批評為歧視女性，再拗落去就成為性別之爭，究竟Google是否為了政治正確，故意增聘一位女高層，無人敢講，世界上好多嘢講到明就冇乜趣味咯！