水炮車，一買三架，耗庫房二千七百萬。警隊振振有辭，光明磊落講解買車的理由：
一，當差，難買樓。難道男子漢連買車都唔得？
二，水炮車，又唔係水貨客，反乜啫。
三，放水定扑棍，任揀，醒少少都揀軟，唔硬碰。
四，水炮車，唔係坦克車，黃絲發夢更咩的……想六四重現？冇諗。
五，慈母水炮車，新發明，有創意，創科局實贊助。車身更可以大賣奶粉廣告。過年過節變身美食車都得。
六，安全第一，水炮車，跟水力按摩差不多。為人民服務，冬天提供暖水炮水療，肯定sweet過蛇齋餅粽。
七，萬一水炮車一年到黑，冇發過市，可以多功能轉型，洗街、救火，甚至警司請客時，可以發炮搞濕身派對助興。
八，為首長服務，假如梁府大少小姐急call白車，水炮車可以代勞。去到禮賓府，食閉門羹的話，可以主動提出，替特首開喉，淋花種菜，妙灑淨水，功德無量。