國際賽期收爐，意味各地主要聯賽進入衝刺期，係時候鎖定目標，全力攻擊「冇得爭」嘅球隊。今周半冷重心，博爭緊歐洲賽席位嘅修咸頓，作客打低護級差唔多上岸嘅愛華頓。
近季常同死敵利物浦喺前列互鬥嘅愛華頓，今季令藍迷好失望，防線常漏水，有美國鋼門侯活都擋唔住，失球仲多過排名比佢哋後嘅侯城同阿士東維拉。呢粒「拖肥糖」，早前受歐霸盃頻密賽期拖累，傷兵不絕，幸近兩戰聯賽連勝季尾例散嘅紐卡素，同埋久沉不起嘅昆士柏流浪，回升至第13位，護級鬆口氣；喺歐霸盃已出局下，愛軍進入無大意義嘅季尾時期。
相反，季前被列強大挖角嘅修咸頓，靠一眾平靚正新兵撐得住，長期喺前列戰鬥，表現係英超中最驚喜；但於二月初，聯賽五戰失咗11分，注定爭霸無望。但近三仗所見，球隊復現朝氣，尤其前仗作客打和車路士1:1，令筆者印象深刻；該仗荷蘭領隊朗奴高文，大膽先棄近八仗食白果嘅箭頭加斯安奴柏利，改以快速突擊踢法，鬥英超一哥仍不落下風，戰術大師原來點只佢同胞曼聯雲高爾一人。
現排第六位嘅修咸頓，連上年度業績也復活，季前出售數位球星所得數千萬鎊未入賬，但除稅後仍大賺逾3,000多萬鎊。喺球會水頭充足，預期下季必大搞下，站穩陣腳嘅朗奴高文，必心雄想帶領這支南部軍，爭戰來屆歐洲賽，季尾賽事要盯緊咯。陣容上，加斯安奴柏利自嘲踢英超近十場九次中柱，腳頭無靈；但佢剛代表意大利，攻破由今戰愛華頓中堅菲臘積基爾卡領導嘅英格蘭防線，信心應回來；相反愛華頓孭重飛嘅中鋒盧卡古，國際賽前已傷，今晚上陣五五波，一來一回，「讓球」平手盤博高水嘅修咸頓，幾穩陣。
韋斯咸受讓「有鬼」
過關先博阿仙奴小勝利記，就算後者傷停多，但兩軍賠率不應如賽前懸殊，信心再大，欠值博率也只宜小注。另一選博包尾嘅李斯特城，氣走另一戰意不明嘅中上游球隊韋斯咸；「狐狸」近八戰二和六負仲要讓波成熱門，乜葫蘆賣乜藥，季尾波玩法，你懂的！
波神
神級攻略 智破足彩