經過國際賽賽事之後，英超聽晚重開，焦點大戰梗係阿仙奴主場對利物浦。紅軍過去一周被談論得最多嘅唔係備戰情況，而係再傳翼鋒史達寧唔肯續約。史達寧周三冇知會球會，接受電視台訪問大講續約問題，講到自己走梗咁款，又話俾阿仙奴睇中「受寵若驚」，咁唔畀面相信已經辣㷫咗球會利物浦。
史達寧年少成名，其實作為一位年僅20歲嘅後生仔，佢𠵱家喺利物浦收緊35,000鎊周薪已經算係好優厚嘅條件。但紅軍為咗可以長時間留住史達寧，雖然佢到下季完結先約滿，都提前同佢傾新約，人工據講仲加到10萬鎊，部份傳媒仲傳出加到18萬鎊。不過幾多都好，史達寧似乎都冇興趣動筆。
「唔貪錢只想要錦標」
英國《BBC》電視台喺周三晚播出史達寧嘅訪問，被問及有關續約問題，呢位國家隊翼鋒話：「完全唔係錢嘅問題。我唔會向錢看，喺我足球生涯裏面，最重視嘅係贏唔贏到錦標，呢個先係重點。我唔在乎會擁有幾多架靚車，或者可以買幾多間屋，我純粹只要最好嘅就得。關於續約問題我都想乾乾脆脆咁去解決，但外界似乎都只係認為呢個20歲𡃁仔只係貪心想要更多錢；但其實我係想搞清楚，要成為更好嘅球員，我應該去邊同埋要做啲乜嘢。如果喺上季嘅呢段時間球會同我傾續約，或者就算開出比𠵱家傳出較低嘅條件，我都會應承，現階段時間上真係唔係好適合。」當被問及有傳唔少球會都想簽佢，當中包括周六對手阿仙奴，史達寧竟然回應話「受寵若驚」，講到咁，睇嚟續約機會真係唔大，仲唔辣㷫班紅軍職球員同粉絲咩。
傳曼城都有興趣斟
據講利物浦球會方面，都係喺節目出街之後先知有件咁嘅事，覺得完全冇受到史達寧嘅尊重；至於領隊羅渣士就好不滿史達寧嗰班管理團隊，認為就係佢哋教唆佢跳草裙舞，不過，羅渣士喺記者會上仍然死撐話史達寧今夏唔會走，又話佢留喺紅軍會有錦標攞。
雖然史達寧貴為英格蘭國腳，唔少球會都有興趣簽佢，但英國《每日郵報》都同佢做咗個數據統計，指佢喺今季英超平均每404分鐘先入一球，喺英超只排第43位，亦比上季嘅266分鐘差好遠；射門入球率亦由上季23%跌到13%，數據上睇其實係退步咗唔少。
另外，紅軍下季轉新牌子球衣，會喺下星期五舉行新波衫發佈會。
識睇，一定係睇足英台【英波Live】：
http://soccer.appledaily.com
http://bit.ly/engballlive