球員上唔上到位，除咗講實力，仲要睇運氣，例如阿仙奴嘅高基連，喺傷兵滿營之下，成為球隊首席防中。至於利物浦嘅安利簡恩（圖）原本最叻係踢防中，但勢估唔到佢喺利物浦上位嘅位置係中堅。
安利簡恩以前喺利華古遜係個好全能嘅球員，閘位、中堅、兩邊中場都踢過，但主要係踢防中。佢今季加盟紅軍，季初機會唔多，唔夠盧卡斯、祖阿倫同佐敦軒達臣爭正選，後備上陣居多。退一步海闊天空，安利簡恩退一步，搵到正選。利物浦喺舊年底改踢三中堅，後防又唔夠人，就搵咗全能嘅安利簡恩試吓，點知一試效果唔錯，之後佢就一直企穩紅軍正選。
相比起同期喺舊年夏天加盟嘅新兵，安利簡恩可能係最少新聞嘅一個，但佢嘅正選位應該係最穩嘅一個。作為中後場，冇新聞即係冇嚴重嘅犯錯，已經係一件好事。除咗防守技術同傳送有番咁上下，安利簡恩嘅全面性亦可以幫領隊羅渣士隨時變陣，絕對係好使好用。
安利簡恩係德國球員，但佢係土耳其裔，好似之前都有報道教大家點正確讀佢個名。喺土耳其文入面，C字嘅發音同英文嘅Junk入面嘅J相似，Can係讀Jun，而唔係讀Ken。因為德國二戰後唔夠勞工，輸入咗好多土耳其人嚟打工，之後啲土耳其人就定居，成家立室。
文：咖喱