六十二歲的芬媽退休第一年不幸證實患上乳癌第三期，手術切除左乳但五年後復發，癌細胞擴散至肺部及左邊身淋巴，化療、電療、標靶藥令她全身肌肉長期刺痛，幸七年來丈夫不離不棄照顧她，不代做家務，還每晚在床邊伴她祈禱才能支撐至今。芬媽現時治療的希望是要花費20萬元的新款標靶藥，只望好心人捐款支持，帶來曙光讓她重生。
記者洪藹婷 莫家文
「做化療好辛苦，令你情緒低落，我有諗過自殺，打嗰啲針令你辛苦到不得了，肌肉係咁跳係咁跳，跳到天光，成晚都冇得瞓，條路咁長，點樣捱呢？」芬媽本來任職老人中心清潔工，每天游過早泳才上班，飲食均衡，生活健康，2007退休，翌年竟確診患乳癌第三期，要做手術切除，「成個左邊胸割咗」，同時割了左邊腋下三粒淋巴瘤，手術後「隻手完全冇曬力」。
育有兩子的她，由幼子支付五年醫藥費，先是六針化療、三十次電療，和服用五年荷爾蒙藥，總計逾十萬元。「食到第五年，有一次無意中照肺，照到有啲好似芝麻咁細粒，醫生話好似腫瘤！」數月後，腫瘤長至如朱古力糖大小，醫生表示要再做化療。
患關節炎的丈夫無法繼續裝修工作，已退休十多年，家中使費靠長子供給，她其後向撒瑪利亞會基金和關愛基金申請逾三十萬元，打了12枝化療針和口服標靶藥，卻出現副作用，「左邊身一路痛，晚晚要食止痛藥，手手腳腳起曬水泡，行唔到路，煮唔到飯，買餸又買唔到﹗」
每晚當她痛到徹夜難眠，幸得枕邊人陪她祈禱渡過，「人做唔到乜野，唯有交俾神﹗」除了心靈支持，丈夫成了家事顧問「自從我有咗呢個病，我都未拖過地，全部家務老公做哂。」醫生建議她轉用另一種標靶藥，一枝針萬六元，要打十二枝，需費二十萬元，「我問過醫生，打四至五枝就會有啲效，如果申請唔到基金，我都唔會再打﹗」「我老公成日都話，捱多幾年你個孫大學畢業，我話點捱呀咁多年，佢成日叫我堅持，其實真係好辛苦﹗」
蘋果日報慈善基金已從「醫療專戶」撥款為芬媽支付第三針藥費，餘下約10萬元藥費有待善長襄助，助她減輕藥費壓力，令她不致斷藥。
「芬媽」捐款編號：C3876
網上捐款： http://bit.ly/1nQRthE