牽牛外遊，小弟代筆。同咖喱提及今周阿利大戰，兩軍有冇啲今季令人有驚喜嘅球員，佢就數咗紅軍嘅安利簡恩出嚟，如果要小弟喺阿仙奴揀一個，非高基連（圖）莫屬。
小弟絕非兵工廠球迷，但過去對高基連嘅印象，就係同費林邦同「呢」。以前打Winning用過阿仙奴，呢兩位係我極快清洗嘅球員。基本上，冇人諗到佢今季會上到位，呢排仲要擔正踢防中，但世事就係咁奇，啱啱好阿迪達、法米尼、艾朗藍斯同韋舒亞等都喺今季先後受傷，蜀中無大將，雲格試試吓發覺高基連踢得都唔差，而且兵工廠班球員，近年唔踢硬朗波，𠵱家有個人踢吓爛仔波，反而令到班前場球員可以更從容進攻，所以就算阿迪達等球員嚟緊復出，都未必可輕易搶番正選。
高基連呢排連續幾場波踢到爆鼻，喺兵工廠球迷心目中又加咗分。不過老實講，佢係夠勤力，但質素就好一般，反而令我諗起𠵱家喺韋斯咸踢緊嘅桑治。喺球會嘅未來發展，高基連只會係替工，而唔係雲格長遠嘅必需品，甚至等佢身價上漲後，善價而沽，就好似當年賣走桑治咁，總有巴塞呢啲水魚會上釣，但對高基連嚟講，冇乜需要諗，總之盡自己本份踢場好波，就已經係贏家。
文：東尼