2017年特首選舉前，前政務司司長唐英年強勢復出，仲招兵買馬搵人入會，唔通想"vote him out"？八方冇呃人，但唔好諗太多，事關唐唐呢次只係為江蘇鄉里，同特首選舉無關。
話說祖籍江蘇嘅唐唐，覺得鄉下經濟發展潛力大，江蘇省GDP有6.51萬億人民幣，全國排第2位，僅次廣東省。唐唐想推動江蘇經貿，亦想召集同鄉幫手推動青年發展，例如可以教吓城市年輕人耕田種米，了解粒粒皆辛苦。
所以唐唐牽頭成立「香港江蘇社團總會」，其他有份牽頭包括方鏗同丁午壽，5月底有成立典禮。唐唐現為籌委會主席，估計佢都會做埋創會會長，佢除咗請咗梁振英去做主禮，仲邀請中央官員，最有可能係統戰部代表，如果泛民想「傾偈」又如何？唐唐話未嘗不可。