特首梁振英似乎好心急加入亞投行、即係亞洲基礎設施投資銀行，所以日前佢開行政會議前不忘話，香港作為國際金融中心，有能力做好作為亞投行一分子嘅工作，仲開到出口叫啲「姑息」拉布議員嘅議員，唔好「姑息」拉布行為。花生友唔知道，言者係咪無心，但肯定聽者有意，有政界口痕友懷疑，梁特劍指立法會主席曾鈺成。
回帶聽一聽，當日梁振英係咁講嘅。佢話如果香港喺加入亞投行嘅過程中，有步驟要立法會審批嘅話，希望嗰啲少數經常慣性拉布嘅議員停止，仲有「部份經常姑息拉布議員嘅議員，不要姑息呢啲拉布行為」。花生友開頭都覺得梁振英又乘機鬧泛民，但係有口痕友就話，成個立法會得大主席曾鈺成一個人可以「剪布」，換言之可以「姑息」拉布嘅、亦係得佢一個箒，梁振英咁講仲唔係畀說話曾鈺成聽？
梁振英同曾鈺成唔啱牙就眾所周知啦，政圈一直話梁振英根本唔想通過政改，曾鈺成就頻頻出嚟做北京同泛民嘅和事老，想盡法令政改過關。今次梁振英咁心急入亞投行，真係阻到佢嘅根本唔係拉布議員，而係可以選擇剪唔剪布嘅大主席。
其實香港入亞投行係利多於弊定係相反？至今冇乜人講得清。就算呢件本身係一件好事，但係落到梁振英手上，以佢硬橋硬馬處理手法，隨時又搞到天怒人怨。
花生友