亞視前日被政府宣佈死刑後，工聯會議員嫻姐陳婉嫻除咗關心亞視員工嘅問題，近日亦忙於煲港視神劇《選戰》，其實入面有個工會阿姐角色，好多人覺得好似嫻姐，但嫻姐睇完就有些小意見，話個角色完全唔似佢！
撐亞視頻譜交港視
平日唔多追電視劇的嫻姐，噚日同八方講起亞視不獲續牌一事，就力促政府唔應該等到亞視被釘牌之日，至思考如何處理亞視擁有的頻譜，應該做到「無縫交接」，將亞視頻譜交畀王維基嘅港視做，仲話覺得港視係最有機會，「如果講最成熟、整裝待發，一定係港視，如想有競爭嘅免費電視，好自然就諗到港視」。
嫻姐又話，自己係港視劇集《選戰》粉絲，一直有透過手機app追看該劇，「我一有時間就睇吓，好好睇」，話特別欣賞劇中廖啟智同王宗堯的演技。互於劇中由陳曼娜飾演，與建制派領袖做政治交易嘅工人黨主席李婉桂，好多人話個造型同嫻姐十分神似，嫻姐坦言唔少朋友睇完都話似佢，但佢睇完就覺得唔似，「佢啲原則同我完全唔相似，我唔做呢啲交易」。
網民翻工聯會舊賬
但有網民就不忘向工聯會翻舊賬，指今日變成港視fans的嫻姐，係13年11月當立法會要求引用權力及特權法，要求政府公開增發電視牌照文件時，就曾同黨友投反對票，一班港視職工會當時與嫻姐聯絡，要求見面時，嫻姐又一直以事忙拒絕，唔知嫻姐今次又會唔會為港視做番啲嘢，證明自己真係撐港視？
李八方
mailto:[email protected]