阿仙奴上場作客紐卡素贏2:1，近六場比賽全勝，氣勢逼人。呢場比賽入兩球嘅基奧特賽後就話：「自從我加盟兵工廠之後，𠵱家係我狀態最好嘅時刻，我想繼續呢種勢頭，唔想就咁停喺度。上季我喺聯賽入咗16球，希望今季可以做得更好，幫球隊達成目標！」𠵱家阿仙奴球員好有信心，除咗基奧特之外，早前奧斯爾仲話自己要喺未來幾年內，成為金球獎得主！
𠵱家阿仙奴穩定地排喺第三，雲格有可能唔能夠以第四名完成球季，不過，如果球隊真係可以打入前三，相信一班廠迷都唔會太介意，話晒下季可以直入歐聯分組賽，唔使打附加賽都係好事。
利物浦中堅位有疑點
至於利物浦，上場除咗輸1:2畀曼聯外，仲有史卡迪爾因為踩對方門將迪基亞而被罰停賽三場，加上後備入場38秒後就因為踩紅魔中場安達靴里拉而攞紅牌嘅謝拉特，兩個大將今場都唔可以上陣。中堅位利物浦可能出老將高路托尼，又有可能出今季表現平平嘅洛夫雲代替，有冇影響真係到時先知。
近年阿仙奴對利物浦都係贏多輸少，嚟到聯賽最後直路，前四隊伍分數相差八分，每一場勝負都好影響排名。今場阿仙奴有主場之利，而且基奧特、奧斯爾等球員都信心十足，比起啱啱失分嘅利物浦，可以睇高一線喺呢場大戰全取三分！
LULU
不懂踢波愛睇波