亞洲電視無得續牌惹嚟網民狂賀，唔少網民最想請小鳳姐嚟熱烈地彈琴熱烈地唱，估唔到連發展局都要抽下水。日前官方facebook專頁post咗篇講香港靚花靚樹嘅帖文，以「心花怒放，喜氣洋洋」為標題，隨即俾眼利嘅網民話佢攞ATV景，唔知係咪俾人講中咗，發展局急急留言回應，話對亞視一班默默耕耘嘅員工面對嘅處境感難過，希望佢哋能夠振作，重新出發咁話。
不過，唔少網民繼續留言「大讚」發展局靚抽，有人話「最鍾意睇發展局fb page抽人水」，有人更話「話你唔系（係）鬼都冇人信」，不過其實發展局facebook已經唔係第一次抽人水，之前就曾暗串民建聯串錯「Marry Chrismax」，係人係鬼真係佢哋至知啦！