近年好多新聞女主播都先後離職，有啲轉去其他電視台，有啲直情轉埋行，各有不同發展。
好似被高登巴打喻為「至索主播」嘅蔡雪瑩（Snowy），於上年11月離開咗無綫，去咗會計公司做公關，不過今日凌晨，佢就喺微博話已經離開咗公司，仲話0依家會轉戰幕前，會拍廣告、司儀等等，睇嚟要殺入娛樂圈喎。
而早前先離開大台嘅周嘉儀BB，噚日就表示已轉行做證券，近日佢喺facebook開咗個人專頁，仲update得都幾密，當然受歡迎啦。惟今日喺佢呢個專頁內，好多網民都質疑呢個專頁係咪佢本人，過咗一陣嘉儀BB就貼自拍照，影埋個專頁，證明個專頁真係佢自己，咁識冧網民，睇嚟周嘉儀BB如果未來想再轉行，殺入娛樂圈都有得諗喎。
講完近期離職嘅人，到講下啲好多年前離職嘅人，就係離開咗亞視七年嘅陳珍妮，噚晚陳珍妮喺facebook，貼咗幾張以前佢喺亞視工作嘅相，0依家亞視不獲續牌，陳珍妮感慨萬千：「離開你已經七年喇，唯講一聲你好嗎？亞視給我的真的很多。工作、機會、戀愛，味道愉悅的記憶，與其後人生對比甚大。看當年笑得多天真。」
之後佢又話：「亞洲電視是我畢業後第二間加入的媒體，過了很開心的十個月，當時有榮總，有Tammy，有好多好同事，有好開心的回憶。第一個逐句口譯的直播，是奧巴馬當選美國總統，工作了這麼久，與國際新聞一直藕斷絲連，睇一份Reuters稿，被訓練到半小時寫好、畫面排好、mark晒time code.....謝謝亞視。」