股評人界大玩音樂椅。過檔君陽證券嘅靚佬股評人鄧聲興（Kenny）前日last day，舊舖AMTD噚日宣佈從富昌證券挖走連敬涵（Kingston），做AMTD證券及資產管理業務部總經理。
Kingston喺富昌做咗四年有多，佢指，雖然富昌老闆、佳兆業（1638）股東郭俊偉近排消息多，但公司經營冇問題，仲好積極緊搵股評人接替佢。佢離開只係因為Kenny親自搵佢轉工，加上AMTD嘅品牌同埋「人工有一定增長」，但增長幾多，佢就唔講喇。
Kingston跟Kenny一樣，周二last day，噚日就返新工，佢話反正復活節都有長假。Kingston之後會從證券方面埋手搞大，所以都有帶埋一班熟客仔過檔，以後亦會接觸多啲零售客戶，即係做番佢最熟悉嘅經紀範疇。